Archive for July, 2011

بعد مظاهرات الجمعة 8 يوليو الحاشدة ( غصبٍ عن عين الطخين و بالبولد و الإيتاليك ) .. و التي انتهت باعتصام في محافظات عديدة
خرج عصام شرف (المنهك للغاية) .. بتصريح .. في رأيي جاء بنتائج عكسية .. لتخاذله الشديد !

إصدار قرار بإيقاف جميع الضباط و القيادات المتهمين بقتل الثوار .. جاي بعد 6 شهور توقفهم؟ ده هزار ده و لا إيه؟
هما قتلوا حد جديد؟ لأ .. طيب أنت شرعت قانون جديد مثلاً يسمحلك بده؟ لأ
امال ايه اللي جد؟ اللي جد ان أهالي الشهداء نزلوا اعتصموا احتجاجاً على اللي بيحصل من تخاذل في محاسبة القتلة و مؤامرات للضغط على أهالي الشهداء للتنازل عن قضايهم ..
يعني عصام شرف .. بعد 6 شهور طلع بالقرار ده عشان اضغط عليه من الشارع
حاعيد و أزيد في الحتة ديه
المشاهدة الأولي .. إن إصدار قرار زي ده بالصورة اللي مشى بيها يدل إن مكنش فيه أي مانع انه يطلع الأسبوع اللي فات أو الشهر اللي فات .. أو يوم عصام شرف ما مسك الوزارة و أنا في الحالة ديه مش فاهم إزاي شرف كان عاوز ظروف أكثر ثورية من حلفانه اليمين في ميدان التحرير انه يطلع بالقرار ده ساعتها!
المشاهدة التانية .. المرتبطة بالأولي .. ده يدل ان فيه تخاذل و تباطؤ و مش عاوز أقول تواطؤ فظيع ! و شوف لو ضغطنا الكام يوم اللي جايين .. حيطلعلنا كام قرار بديهي زي اللي طلع ده

التنسق مع رئيس محكمة استئناف القاهرة عشان يشوف قضايا الشهداء .. من غير التقيض بالإجازة القضائية للنوع ده من القضايا
تاني .. قرارات و إجراءات استثنائية ! هو أنت يا عصام يا شرف مجيتش في ظرف استثنائي  عشان تتخذ القرارات الاستثنائية ديه ساعتها؟
مش مصدق اللي كنت بسمعه امبارح .. ياريته مكنش قاله !
و كذلك بالنسبة لموضوع النائب و تشكيل فريق من أفضل و اكفأ رجال النيابة و موضوع الطعن على الأحكام بالبراءة المتعلقة بقضايا قتل المتظاهرين
و قرار تأسيس آلية الحوار و أيضا صرف مستحقات الشهداء
الفيديو ده كان معاده المفروض يبقى في شهر مارس بعد أسبوع و لا اتنين بالكتير من توليك المنصب ده

ديه الملاحظات اللي أي حد ممكن ياخدها من خطاب شرف .. بالإضافة ان شكله منهك أوي و أنه صعبان عليا ..
لكن
عصام شرف غلطان .. ممكن يكون غلطان عشان متباطيء .. أو عشان متواطيء .. أو عشان راضخ لضغط المجلس العسكري و ما استقلش و رجع الميدان
و أرجح أنه السيناريو التالت مدمج مع السيانريو الأول

أيام مبارك .. طلعت موضة كده .. ان ابونا مبارك حبيبنا .. بيضحكوا عليه و بيعملوا الحاجات الوحشة من وراه و هو مش عارف ( عذر أقبح من ذنب طول عمرخه ) بس للأسف ده بيتكرر تاني عند شرائح كتير من الناس!
لازم الواحد يعمل إرجاع للسبب الرئيسي ! و في هذة الحالة هو المجلس العسكري
سمعنا كلنا عن إن عصام شرف قدم إستقالته 6 مرات .. سمعنا انه طلب يغير 10 وزراء .. و اتقابل بالرفض .. سمعنا ممدوح شاهين طالع يقول الشعب قال نعم للمجلس العسكري
مبارك بيصيف في شرم الشيخ .. أو في ميونيخ أو في الهند أو في كوكب المريخ ! هل في دليل قاطع على أي حاجة من ديه !
كلنا في موضع الشك ..
مستحيل اجزم أن مبارك جوا مصر أو مبارك برا مصر
المشكلة الحقيقية بقى هي كام موضوع معلق زي الموضوع ده و يستحيل الجزم فيه!
مين اللي مش مقدم الشفافية ديه ! و مين اللي رش الضباب ده في كل حتة … المجلس العسكري

حنرجع نقول تاني
مينفعش في فترة زي ديه تفترض حسن النية .. في أي حد حيحكمك .. مينفعش تقول الجيش حمى الثورة و تفضي دماغك من كل حاجة ! و تسيبه هو يتعامل بافتراض انه حيعملك كل حاجة حلوة
مكناش شيلنا حسني مبارك بقى طالما حاسلم البلد لحد تاني
علشان كده من أول يوم كان واجب اننا نفتح عنينا .. و ننتقد و نتربص بكل حاجة المجلس العسكري بيعملها

و طبعاً بما ان بقى من الواضح جداً .. إن أفعال المجلس العسكري مريبة .. الواحد بدأ يسأل نفسه ! .. هل اختيار عصام شرف من الأساس كان اختيار ثوري ؟.. و بما إن المجلس العسكري “كده” حيختار واحد يمثل الشعب فعلاً؟
و هل تحية اللواء الفنجري كان المجرد تثبيت الناس .. و هل المجلس العسكري و على رأسهم طنطاوي و عنان من المثالية إنهم يتجاوزا علاقات الصداقة و ينعقد المجلس من غير حسني مبارك من غير ميقولوله .. ريح أنت بس و حتعيش بيقة حياتك معزز مكرم؟

الدروس المستفادة
واحد: لا تثق في أي حد غير نفسك .. و شرف و لا ترف ! و لا عسكر و لا حرامي .. مفيش افتراض لحسن النية .. ماتخدش بالأقوال .. الأفعال بس .. لازم كلنا إيدينا تبقى في كل قرار بيتاخد و نفضل نضغط لحد ما نوجد الآلية اللي تحقق ده
اتنين: مفيش حاجة اسمها سيب ام الميدان و نرجعله تاني ! من الواضح جداً انك بترجع للميدان بطلوع الروح .. يا المطالب كلها يا الميدان و احياناً الميدان لوحده مش كافي و لازم يحصل تصعيد
تلاتة: المشكلة الرئيسية مع المجلس العسكري .. مش مع شرف أو العيسوي أو الاراجوزات .. و إن كان مبارك شخص طغى في الفساد و ريحته طلعت كان من السهل انك تحشد ضده الناس لكن مش ده الحال مع المجلس العسكري!

___________
تعقيب

العيسوي دلوقتي بيقول إن عصام شرف مش من حقه يوقف الضباط .. ده قرار الداخلية هي بس اللي تخده
و بيقولك .. كله بالقانون
و مشاهدة أخيرة
إزاي يا عصام يا شرف تطلع تقول بيان زي ده من غير ما تجتمع مع وزير الداخلية عشان تتناقشوا في القرار ده
أنا مش مصدق العشوائية و الفوضوية و شغل الهواة ده

مبرري لكتابة البوست ده هو ببساطة عشان مضحكش على نفسي و عشان اللي مش عارف يعرف
و عشان مهما الدنيا مشيت شمال أو يمين … ارجع اقرا ده و افتكر

*****

داخلين على الأسبوع و في مظاهرات و مسيرات و أحياناً اعتصامات احتجاجاً على أحداث  28-29 يونيو

جميل.
في اسكندرية أهالي الشهداء معتصمين كل يوم من ساعتها عشان دم ولادهم اللي حاسين انه راح هدر
جميل برضه ( جميل انهم يعتصموا و يتفاعلوا مش جميل انه راح هدر طبعاً )
لكن .. و أنا حاتكلم على لسان كريم منير صديق ليا كان هناك  من أول يوم
” أنا النهاردة كنت باتكلم مع أم لشهيد و كنت حاعيط ! و اللي ضايقني اكتر اني عارف انها صادقة و كل حاجة لكن للأسف الناس اللي حواليها بيستغلوها “

طبعاً الناس اللي حواليها .. هي بكل أسف قوى سياسية المفروض انها مسؤوله لكنها للأسف بتقوم بدور الزبالين حاليأً .. بتلم أكبر قدر من الوطنية من على الأرض و أحياناً استغلال للشهداء كمان .. زي مين .. بذكر أسماء .. زي حركة ستة أبريل و حركة دعم البرادعي و حركة مصر بلدنا و مجلس أمناء الثورة !
للأسف قبل ما يكون همهم الصالح العام همهم الظهور! المباديء بقيت في الطراب
اولاً حركة دعم البرادعي مثلاً موقفها الرسمي مش مع الاعتصام و مع ذلك في أفراد كتير أوي منها نازلين بشكل “شخصي” .. على أي أساس بتنسب مهامك التنسيقية للحركة بقى
مثلاً .. بعد ما اتفقوا ان محدش يعلق يفط لنفسه .. اتخانقوا مع بعض عشان بعض منهم عاوز يعلقها
مثلاُ .. بعد ما كل البني آدمين بدون استثناء ضربوا في عربية الإخوان اللي دخلت .. طلعت حركة دعم البرادعي و شباب 6 أبريل بيانات اعتذار للإخوان و بتقول انها مش مسؤؤلة!
مثلاً .. ممكن كلهم يختلفوا و يتعاركوا و يمسكوا في بعض عشان الاعتصام عند جامع ابراهيم على البحر مش في سعد زغلول .. المشكلة الأكبر انهم بيتخانقوا لأن المكان اللي الناس معتصمة فيه بعضهم مكنش هو صاحب القرار في اختياره
مثلاً .. 6 أبريل قالت يوم الخميس ان احنا حنعتصم  غير فرض القرارت اللي عملوها و اللي كان في منها قرارات غلط مثل نصب الاعتصام على البحر و النية اللي كان متفق عليها ان البحر ما يتقطعش لكن طبعاً حصل .. يوم الجمعة اعلنوا انسحابهم لأن المظاهرات فشلت

http://www.facebook.com/notes/%D8%B4%D8%A8%D8%A7%D8%A8-6-%D8%A7%D8%A8%D8%B1%D9%8A%D9%84-%D8%A7%D9%84%D8%A3%D8%B3%D9%83%D9%86%D8%AF%D8%B1%D9%8A%D8%A9/%D8%A8%D9%8A%D8%A7%D9%86-%D8%AD%D8%B1%D9%83%D8%A9-%D8%B4%D8%A8%D8%A7%D8%A8-6-%D8%A7%D8%A8%D8%B1%D9%8A%D9%84-%D8%A7%D9%84%D8%A7%D8%B3%D9%83%D9%86%D8%AF%D8%B1%D9%8A%D8%A9-%D8%A8%D8%B4%D8%A3%D9%86-%D8%A7%D9%84%D8%A7%D8%B9%D8%AA%D8%B5%D8%A7%D9%85-%D8%A7%D9%84%D8%B0%D9%89-%D9%83%D8%A7%D9%86%D8%AA-%D9%82%D8%AF-%D8%AF%D8%B9%D8%AA-%D9%84%D9%87-%D8%A7%D9%84%D8%AD%D8%B1%D9%83%D8%A9-%D9%81%D9%89-%D9%88%D9%82/228495623840280

! لما العدد قل و مكنش جايب همه انسحبوا من الاعتصام .. أنا اعرف اللي بيعتصم عشان قضية بيعتصم و لو لوحدة ! لأن العنى الوحيد انك تمشي عشان العدد قليل انك تتشاف !
انا مش متربص لحد عشان أكيد حتتفهم كده .. انا مش بنتمي أصلاً لأي حزب او حركة او بركة لكن واجب النقد اللاذع للسلوكيات اللي  بالمنظر ده .. و يقولك براجماتية ( ده المصطلح اللي طالع موضه دلوقتي ) انت فاهم يعني ايه براجماتية يا كائن انت و هو؟
مفيش احلى و اسهل انك تعتبر “الرييل بوليتيك” انه يعتبر أسلوب مييكيافيللي و ان الغاية تبرر الوسيلة؟
ليه؟ انتوا معظمكوا حركات ثورية؟ ليه القذارة ؟ عشان طموح مريض مش حيتحقق بكرسي في مجلس الشعب؟
أنت مش عارف ان ده مش دورك
المشكلة ان التفكك و الأساليب الوصولية القذرة ديه عمر ما حتخليك في الآخر توصل لحاجة !
طبعاً مش حتكلم على تلاشي الدور الحزبي .. الأحزاب اللي كلهم مش فاضيين للشارع و المطالب الحقيقية و فاضيين يدخلوا في اتحاد و يسجدوا للإخوان و يطلعوا في البرامج
ده غير ان في ناس بتنزل يوم الجمعة بس .. بعد الصلاة ترفه عن نفسها شوية .. و تاخدلها كام صورة و كل عام و انتم بخير

و أحب أقول لكل حزب أو حركة .. انتوا شوية شخاشيخ كنتوا حتى المحترم فيكوا كان مدى تأثيرة ميعديش المسافة بيني و بين الشاشة .. فياريت تتلموا كلكوا و تحترموا نفسكوا
و أنتوا أوسخ بمراحل من الحركات اللي فوق اللي ذكرت اسمها .. لكن وساختكم ديه يتكتب فيها دواوين !
و الأخوة السلفيين .. ياللي بتقروا النقل لى العقل ! اشمعنى يعني ما حربتوش عشان المحاكمات العادلة للمجرمين قاتلي الشهدا تحصل .. و لا ديه غير قابله للنقل .. أنتوا فالحين بس تروحوا (ياسر برهامي أحد كبار شيوخ السلفية في الاسكندرية و غيره ) تتفاضوا مع أهالي الشهداء و تعرضوا عليهم ديه عشان يتنازلوا ! عشان مين .. عشان شوية مجرمين !

عامةً الاعتصام الحالي هو اعتصام من أجل التوعية .. عشان الناس تعرف أهداف الجمعة 8 يوليو !
“الكلمتين دول كانوا مكتوبين قبل ما حزب الحرية و العدالة و بعض الأحزاب الأخرى تعلن انضمامها لمظاهرات الجمعة 8 يوليو ! ( المظاهرات بس مش الاعتصام ) )

عامةً لأي واحد عنده مصلحة ألوانك بانت خلاص بعد ما سبت الشارع .. و إن شاء الله محدش حينسى تاني .. و حارجع و أقول ان المجلس العسكري اللي بيعملوا فينا حلال .. طول ما فيه قوي سياسية متخاذلة اتعودت على السجود فبدأت تسجد تاني لما جاتلها الفرصة .. بس إن شاء الله زي ما الشعب عمل الثورة بدمه حيتممها بدمه و عرقه و لا الحوجة لأمثالكم

ساعدني في الكتابة كريم منير .. اللي كان شاهد عيان و متواجد طول الوقت و برضه اللي سب لهم كل مرة