Posts Tagged ‘Armed Forces’

ضارب التلاهي يا ** أمك

:واحد
الأسطول اللي عند قناة السويس عشان تأمين الحركة الملاحية

عشان السويس بيعدي منها حاجات كتير غير الفلايك
و من السذاجة إن امريكا أو أي بلد تانية في العالم تفكر تدخل مصر دلوقتي عشان حتتقرقش
فبلاش و النبي استنتاجات ساذجة عشان مش ناقصة ناس مفتحة

 

اتنين :
مبارك دايماً كان مخوف اللي بره من الأخوان على أساس إنه تيار إسلامي متطرف و إنه هو راعي الأمن و الأمان
و طبعاً مش دي الحقيقة !

الغرب بقى ..
الغرب فاهم كويس إن الأخوان مش تيار إيران من الآخر ده السيم اللي ما بينهم قدامنا
…الاتنين فاهمين إن الاخوان مش خطر .. أمريكا خايفة إن مصر يبقى فيها ديمقراطية و استقلال و خايفة يمسكها واحد عنده دم و يضر علاقتهم بإسرائيل
و مبارك معندوش أخلاق و لا دين أصلاً و مش فارق معاه مصر تروح فين طالما هو و اللي تحته بيهبشوا في مليارات

 

تلاتة :
محدش بعد كل أم خطاب ينفخني و يقولي ما هو أنت اخدتوا اللي انت عاوزينه
الشعب يريد إسقاط أبو أم النظام
كل مرة النظام مابيسقطش

و كلها وعود واهية و كلام فارغ و محاولات للالتقاف على مطالبنا .. عشان سيادتكم تقوموا قايلين مانتوا اخدتوا اللي انتوا عاوزينه و نمسك في بعض و ننزل من على ودانه شوية
و أنا مش حاستحمل عمر سليمان يمسكنا و لو يوم واحد
احنا مش حنخلص من فرعون يطلعلنا الأوسخ منه

 

أربعة :
العالم كله كان فاهم إن مبارك حيتنحي
رئيس المخابرات الأمريكية قال حيتنحى
كذلك حسام بدراوي و كذلك أحمد شفيق و كذلك مصادر كتير

حتى الجيش بلغ الناس في التحرير عن أخبار حلوة
إلا أنس الفقي , الوحيد اللي قال مش حيتنحى

و طلع الخطاب

أولاً الخطاب مكنش على الهوا و اتلعب فيه في آخر لحظة و فاجيء الناس كلها
معلش فكك من السياسة و حلل و فكر بمنطقية

غلطات مونتاجية بتدل على الفبركة .. و تغير في الكادر .. دي عمري في حياتي ما شفتها في أي بيان من النوع ده

معلش اديني سبب ان الريس يقرا شوية من الشاشة و بعدين من الورق و بعدين من الشاشة تاني
من الآخر الخطاب .. غبر انه متسجل حصل فيه لعب و ده أكيد

و ده أن بين حاجة .. يبين وساخة النظام بقيادة عمر سليمان

خامسة :

مبارك مش زي أبويا !
أبويا مش سفاح و لا حرامي .. و لا بيرعى تحته شلة و سخة من الحرامية و السفاحين و تجار المخدرات و تجار الآثار و تجار الأراضي
أبويا معهوش 70 مليار و 40% من الشعب مش لاقي ياكل
أبويا مخربش دماغ الناس بتعليم زي الزفت
أبويا و أبوك و خلاني و عمامي حاربوا في حرب 73 .. حرب 73 مش حكر على مبارك عشان كل خطاب يقوله ينسبها لنفسه
و أخيراً أبويا عنده أخلاق و بيراعي ربنا

 

:ستة

التصعيد
في ناس بتقول أفضل في ميدان التحرير و متصعدش
أولاً أنا مع التصعيد و لكن مش أي تصعيد
يعني مثلاً الناس اللي راحت قصر العروبة .. غلطانة
في فرق بين الجيش و الحرس الجمهوري .. التهور في الوقت ده غلط و ممكن يجيبلنا الخراب
لكن أنا مثلاً مع توسيع رقعة الاعتصامات و الاعتصام عند ماسبيرو و إن أمكن احتلاله سلمياً
لكن أنا مش مع عدم التصعيد خالص خالص خالص
تويتر و الفيسبوك .. الأيام اللي فاتوا كان في جزء كبير من الكلام على التصعيد
في ناس متير اتكلمت في الإعلام قالت إن فيه تصعيد حيحصل
عشان كدة امبارح .. الحكومة حاولت تبادر المرة ديه و مش ترد الفعل زي كل مرة
ليه ؟ عشان عارفين إن في تصعيدٍ ما كان حيحصل
لو هما كانوا فاهمين ان النهاردة يوم عادي مكنش حد اتحرك  و مكنش موقف امبارح اتاخد
من الآخر لو مكنش في احتمالية للتصعيد .. مكنش حصل اللي حصل امبارح
عشان كده انا مع التصعيد
عشان نخلص

:سبعة

أنا مش حراهن على الجيش أوي ..
أنا حراهن على الشعب
تأخير الجيش لحد دلوقتي بيقول أنه عاوز يشوف إيه اللي حيحصل و بيقول إن فيه انقسامات
في جميع الحالات لو الجيش كان عاوز يحسم الأمر كان حسمه من زمان
اتمنى انه يحسمها و يريحنا و نخلص .. و يمشي السيناريو زي ما احنا عاوزين
لكن من الآخر .. احنا اللي حنحدد كل شيء
*تمت كتابته قبل البيان

:تمانية

بعد البيان
محدش يطلع من الشارع .. محدش يروح
وجود عمر سليمان غير مرغوب
اللعبة القذرة اللي حصلت امبارح ليها سبب
النظام بيحاول يمسك في السلطة .. بأي شكل
الضغط دلوقتي حيبقى أسهل .. لو ضغطنا أكتر على ما أظن الجيش حيضطر يخضع

أخيراً .. عمر سليمان
أنت برنس .. أنا كنت عارف إنك حتعرف تعملها
بس والله ما أنت قاعد